กตํ ปาปกมฺมํ พฺยนฺติ โหตีติ ฯ กลฺโลสิ ภนฺเต นาคเสนาติ ฯ

ปกติอคฺคิโต เนรยคฺคีนํ อุณฺหารปญฺโห ฉฏฺโฐ ฯ

ราชา อาห ภนฺเต นาคเสน ตุมฺเห ภณถ อยํ มหาปฐวี อุทเก ปติฏฺฐิตา
อุทกํ วาเต ปติฏฺฐิตํ วาโต อากาเส ปติฏฺฐตีติ เอตํปิ วจนํ น สทฺทหามีติ ฯ เถโร
ธมฺมกรเกน อุทกํ คเหตฺวา ราชานํ มิลินฺทํ สญฺญาเปติ ยถา มหาราช อิทํ อุทกํ
วาเตน อาธาริตํ เอวํ เอตํ อุทกํปิ วาเตน อาธาริตนฺติ ฯ กลฺโลสิ ภนฺเต
นาคเสนาติ ฯ

ปฐวีสณฺฐารกปญฺโห สตฺตโม ฯ

ราชา อาห ภนฺเต นาคเสน นิโรโธ นิพฺพานนฺติ ฯ เถโร อาห อาม มหาราช
นิโรโธ นิพฺพานนฺติ ฯ กถํ ภนฺเต นาคเสน นิโรโธ นิพฺพานนฺติ ฯ สพฺเพ พาลปุถุชฺชนา
โข มหาราช อชฺฌตฺติกพาหิเร อายตเน อภินนฺทนฺติ อภิวฑฺฒนฺติ อชฺโฌสาย ติฏฺฐนฺติ
เตน เต สตฺตา โสเตน วุยฺหนฺติ เต สตฺตา น ปริมุจฺจนฺติ ชาติยา ชรามรเณน โสเกหิ
ปริเทเวหิ ทุกเขหิ โทมนสฺเสหิ อุปายาเสหิ น ปริมุจฺจนฺติ ทุกฺขสฺมาติ วทามิ ฯ สุตวา
โข มหาราช อริยสาวโก อชฺฌตฺติกพาหิเร อายตเน นาภินนฺทติ นาภิวฑฺฒติ อนชฺโฌสาย
ติฏฺฐติ ตสฺส ตํ อนภินนฺทโต อนภิวฑฺฒโต อนชฺโฌสาย ติฏฺฐโต ตณฺหา นิรุชฺฌนฺติ
ตณฺหานิโรธา อุปาทานนิโรโธ อุปาทานนิโรธา ภวนิโรโธ ภวนิโรธา ชาตินิโรโธ ชาตินิโรธา
ชรามรณํ โสกปริเทวทุกฺขโทมนสฺสอุปายาสา นิรุชฺฌนฺติ เอวเมตสฺส เกวลสฺส ทุกฺขกฺขนฺธสฺส
นิโรโธ โหติ ฯ เอวเมว โข มหาราช นิโรโธ นิพฺพานนฺติ ฯ กลฺโลสิ ภนฺเต
นาคเสนาติ ฯ

นิโรธนิพฺพานปญฺโห อฏฺฐโม ฯ

ราชา อาห ภนฺเต นาคเสน สพฺเพ ลภนฺติ นิพฺพานนฺติ ฯ เถโร อาห
น โข มหาราช สพฺเพ ลภนฺติ นิพฺพานํ อปิ จ โข มหาราช โย สมฺมา ปฏิปนฺโน
อภิญฺเญยฺยธมฺเม อภิชานนฺโต ปริญฺเญยฺยธมฺเม ปริชานฺโต ปหาตพฺเพ ธมฺเม ปชหนฺโต
ภาเวตพฺเพ ธมเม ภาเวนฺโต สจฺฉิกาตพฺเพ ธมฺเม สจฺฉิกโรนฺโต ลภติ นิพฺพานนฺติ ฯ
กลฺโลสิ ภนฺเต นาคเสนาติ ฯ

นิพฺพานลภนปญฺโห นวโม ฯ

ราชา อาห ภนฺเต นาคเสน โย น ลภติ นิพฺพานํ โส ขานาติ สุขํ
นิพฺพานนฺติ ฯ เถโร อาห อาม มหาราช โย น ลภติ นิพฺพานํ โส ชานาติ สุขํ
นิพฺพานนฺติ ฯ กถํ ภนฺเต นาคเสนน โย น ลภติ นิพฺพานํ โส ชานาติ สุขํ
นิพฺพานนฺติ ฯ ตํ กึ มญฺญสิ มหาราช เยปิ อจฺฉินฺนปุพฺพหตฺถปาทา ชาเนยฺยุํ
เต มหาราช ทุกฺขํ หตฺถปาทจฺเฉทนฺติ ฯ อาม ภนฺเต ชาเนยฺยุนฺติ ฯ กถํ
ชาเนยฺยุนฺติ ฯ อญฺเญสํ ภนฺเต ฉินฺนหตฺถปาทานํ ปริเทวนฺตานํ สทฺทํ สุตฺวา ชานนฺติ
ทุกฺขํ หตฺถปาทจฺเฉทนฺติ ฯ เอวเมว โข มหาราช เย น ลภนฺติ นิพฺพานํ เต ทิฏฺฐนิพฺพานานํ
เตสํ สทฺทํ สุตฺวา ชานนฺติ สุขํ นิพฺพานนฺติ ฯ กลฺโลสิ ภนฺเต นาคเสนาติ ฯ

นิพฺพานสุขภาวชานนปญฺโห ทสโม ฯ

จตุตฺโถ วคฺโค ฯ